Ayuntamiento Estella-Lizarra Udala

Urriaren 20an, ostegunean, itxi egin zen Lizarrako Udaleko Herritarrekiko Harremanetarako Batzordeak deitutako auzo-kontseiluen zikloa, Unai Errazkin buru dela. Deialdi horien helburua gure hiriko auzo eta eremuetan proiektatu diren planak ezagutaraztea eta azaltzea izan zen.

180 pertsona inguruk aukera izan zuten bertatik bertara ezagutzeko Lizarrako Udala gure hiria osatzen duten auzoetan lantzen ari den proiektu eta jarduerak. Koldo Leoz alkate eta Lizarrako Udaleko Hiri Plangintza eta Proiektu Estrategikoen Batzordeko buruak Udaletik jarraitzen diren ildo estrategikoak azaldu zizkien bertaratutakoei, eta hiriko hainbat tokitan alor desberdinetan egiten ari diren proiektuen xehetasunak azaldu zituen.

Era berean, lau Auzo-Kontseiluetako bigarren zatian, bertaratuek aukera izan zuten beren auzoetan lehentasuna izanen zuten beharrak eta jarduerak planteatzeko. Horrela, bai Ogasun Batzordea, Koldo Leoz buru dela, bai Hiritarrekiko Harremanetarako Batzordea, Unai Errazkin buru dela, egindako ekarpen guztiak aztertzen ari dira, Udaleko zerbitzu teknikoekin egiaztatu ondoren, ahal den neurrian, 2023ko ekitaldirako prestatzen ari den aurrekontuen zirriborrora eramateko.

Emandako beharren artean, batzuk zona guztietarako komunak dira: garbiketa hobetzea puntu zehatzetan, berdeguneak mantentzea (belar-sastrakak garbitzea, bideak garbitzea…), errepideak asfaltatzea, kaleak mantentzea (espaloi berriak eraikitzea, galtzada-harriak jartzea, baldosa solteak konpontzea…), trafikoarekin zerikusia duten gaiak (semaforoak eta zebra-pasabideak jartzea, bide-seinaleak…) eta gizalegearekin zerikusia duten beste batzuk.

Batzarretan jasotako ekarpen horiek guztiak Herritarrekiko Harremanetarako Batzordean eta Ogasun Batzordean aztertuko dira hurrengo egunetan.