Ayuntamiento Estella-Lizarra Udala

Museoen Nazioarteko Kontseiluak (ICOM, siglak ingelesez) 1977an maiatzaren 18a ezarri zuen
Museoen Nazioarteko Eguna izateko, jendea sentsibilizatzeko museoek duten zereginaz
gizartearen garapenean. Hori ospatzeko, Gustavo de Maeztu Museoak jarduera batzuk prestatu ditu maiatzean.

Museoen Nazioarteko Egunaren (DIM) helburua da museoek kultura-trukerako, kulturak aberasteko eta herrien arteko elkar ulertzea, lankidetza eta bakea garatzeko duten garrantziaz jabetzea.

Museoak funtsezkoak dira gure komunitateen ongizatea eta garapen jasangarria lortzeko.

Konfiantzazko erakundeak eta gure gizarte-ondare komuneko elementu garrantzitsuak direnez, kokapen pribilegiatua dute aldaketa positiboa sustatuko duen domino-efektua sortzeko.

Museoek zeregin bat dugu etorkizun iraunkorrak eratzeko eta sortzeko, hezkuntza-programen,
erakusketen, dibulgazio komunitarioko jardueren eta ikerketaren bidez.

Aurtengo gaiak, «Museoak Hezkuntzarako eta ikerketarako», museoek hezkuntza-erakunde
dinamiko gisa duten garrantzia azpimarratu nahi du, kultura ikastea, aurkitzea eta ulertzea sustatzen dutenak.
Museoen Nazioarteko Eguna une paregabea da nazioarteko museo-komunitatearentzat.

Museoak kultura-trukerako, kulturak aberasteko eta herrien arteko elkar ulertzeko, lankidetzarako eta bakerako bitarteko garrantzitsuak direla kontzientziatu nahi da.

Milaka museok antolatzen ditugu ekitaldi eta jarduera sortzaileak egun horietan, museoek gizartearen zerbitzurako eta garapenerako erakunde gisa duten zeregina nabarmentzeko.

Horretarako, Museoen Nazioarteko Eguna ospatzeko jarduerak diseinatu ditugu Gustavo de Maeztu museoan.

«Retanaren mendeurrena. Lizarra bere margolanean» erakusketarekin hasiko gara. Maiatzaren 3an inauguratu zen, eta 2024ko ekainaren 30era arte bisitatu ahal izanen da. Halaber, «Iradokizunak» erakusketa-gunean Iñaki Lazkoz artistaren «441 Singel-Amsterdam» lana aurkeztu da, eta 2024ko ekainaren 30era arte ere bisitatu ahal izanen da.

Maiatzaren 11n, larunbata, 11:00etan, sormen-tailer bat izanen da Iñaki Rifaterraren eskutik, eta «Estella-Lizarrako Ikono-grafia» izanen du izenburua. Aire zabaleko marrazketa-tailer teoriko eta praktiko honen bidez, Lizarrako hiri-paisaia bere txoko enblematikoenen erretratutik jorratuko da, Retana edo Maeztu bezalako artisten lanak erakusteko.

Azterketa, kokapena, zirriborroa eta marrazketa izanen dira lantegi honetan egin beharreko urratsak.

Parte hartzeko, aldez aurretik eman behar da izena, Museoan, asteartetik larunbatera, 09:30etik 13:30era, eta arratsaldez, 16:00etatik 19:00etara; igande eta jaiegunetan, 11:00etatik 14:00etara; edo telefonoz, 948 546 037 zenbakian. Plazak mugatuak dira.

Maiatzaren 18an, 11:30ean, bisita gidatua izanen da: «Horrelakoak gara. Topaketa bat Gustavo de Maezturen hiritarrekin», ikuspegi psikologikotik. Gustavo de Maezturen artelanetako keinuen interpretazioan eta esanahian oinarritutako bisita gidatua. Carlos Oderiz Psikologia Graduko ikasleak egina, Gazteentzako Ondare Elkartearekin lankidetzan.

Bisitaldian, bertaratzen direnek gertutik hainbat lan ikusteko aukera izanen dute, espresibitatea eta keinuen aberastasuna nabarmentzeko. Keinu sotilak, adierazpen emozional biziak, obra bakoitza abiapuntu bat izanen da hitzik gabeko komunikazioa edo giza identitatea bezalako gaiei buruz gogoeta egiteko.

Karlosek gidatuta, parte-hartzaileak keinuak aztertzera gonbidatuko dira, haien esanahia aztertuz eta artearen eta giza izaeraren ulermen sakonagoa sustatuz.

Hurrengo egunean, maiatzaren 19an, igandea, 12:00etan, musika-saio berezia izanen da, musikazale guztiak liluratuko dituena. Fernando Sanchez saxofonista eta Guzmán Uruñuela pianista elkartu egin dira doinuz eta harmonia bikainez betetako eguerdi ahaztezina eskaintzeko.

Maiatzaren 26an, larunbata, bisita gidatua eginen da «Retanaren mendeurrena. Lizarra bere margolanean» aldi baterako erakusketara». Bi saio izanen dira, 11:00etan lehen saio bat euskaraz eta 12:00etan beste bat gaztelaniaz.

Bisita gidatuan, Florentino Fernandez de Retana artistaren lanak aztertuko dira, Iñaki Rifaterra artistaren eskutik. Artista horren protagonista ikonografikoa Estella-Lizarra dela ikusiko dugu, Retana bizi izan zen eta sentimentalki elkartuta egon zen hiria. Hiri honek Lizarrako irudiak, txokoak eta bistak berregiteko obrak egitera eraman zuen, ondare eta edertasunez betetako hiria baita.

Jarduera horietarako sarrera doakoa da eta adin guztietarako dira. Gainera, museoa udako ordutegian bisita daiteke; asteartetik ostiralera 9:30etik 13:30era eta 16:00etatik 19:00etara, igande eta jaiegunetan 11:00etatik 14:00etara; astelehenetan museoa itxita egoten da.