Ayuntamiento Estella-Lizarra Udala

Datorren urriaren 25ean, Lizarrako Frai Diego Kultur Etxean ‘Euskararen erabileraren indarra gazteen artean’ topaketa eginen da, Euskaltzaindiaren eta Lizarrako Udalaren arteko lankidetza hitzarmenaren barruan.

Jardunaldi honen helburua gazteen artean euskararen erabilera sustatzea da, inguruko biztanleen bizipenetan eta esperientzietan arreta berezia jarriz. Herritarrak eta herriko eragileak izanen dira benetako protagonistak, kazetari batek gidatutako dinamikarekin.

Euskara hutsean eginen den topaketak hiru ardatz nagusi izanen ditu:

• Lehenengoan, kultur eta kirol arloko bi pertsona nabarmenek beren bizitzan zehar eta egunerokotasunean euskararekin duten harremana partekatuko dute.
• Bigarrenean, hiru gaztek euren esperientzia pertsonalak, euskaraz bizitzeko aurkitzen dituzten aukerak eta hizkuntzaren etorkizunari buruz duten ikuspegia azalduko dituzte
• Azkenik, atsedenaldi labur baten ondoren, bi irakaslek (horietako bat Garean elkarteko kidea) eta EuskarAbenturako ordezkari batek beren ikastetxeetan euskararen erabilera bultzatzen duten baliabideak eta hezkuntza-proiektuak aurkeztuko dituzte.

Topaketa honek elkarrizketarako, hausnarketarako eta motibaziorako gunea izan nahi du, belaunaldi berrien artean euskara bizirik mantentzeko konpromisoa sendotuz.