Ayuntamiento Estella-Lizarra Udala

Nafarroako Unibertsitate Publikoko (NUP) ehun zientzialari inguruk hartuko dute parte irailaren 25ean eta 26an Ikertzaileen Gau Europarraren seigarren edizioan. Europar Batasunak sustatutako ekimena da, ikerketa zientifikoa herritarrei modu inklusibo eta parte-hartzailean hurbiltzeko. NUPen programak hogeita hamar jarduera proposamen  baino gehiago ditu, eta Iruñea, Lizarran eta, lehenengo aldiz, Tuteran eginen dira. Tuterako eta Lizarrako ekitaldiak hilaren 25ean, osteguna, eginen dira, eta hilaren 26an, ostirala, Civicanen eginen dira Iruñeko jarduerak. Parte-hartzea doakoa da, eta zenbait jardueratan (dastaketak eta ibilaldiak) izena eman behar da aldez aurretik  postu mugatuak daudelako. Informazio osoa eta izen-emateak eskuragarri daude jada Ikertzaileen Gau Europarraren webean.

Ekitaldia European Researchers’ Night ekimenaren barruan dago, Europar Batasunak sustatutako ekimena da  —NUPek G9-SCIENCE4ALL proiektuaren bidez parte hartzen du— ikerketa zientifikoa herritarrei hurbiltzeko asmoarekin. Jarduerek Europar Batasunaren finantzaketa dute (Ikerketa eta Berrikuntzarako Esparru Programa, 101162477 zenbakidun dirulaguntza-hitzarmenarekin), eta Nafarroako Gobernuaren, Nafarroako Kutxa Fundazioaren (Civican) eta Tuterako eta Lizarrako udalen laguntza dute.

Zenbait formatu eta parte hartzeko jarduera

Jarduera-programa bost formatutan dago egituratuta, eta pentsatuta daude ikerketa herritarrei hurbiltzeko askotariko inguruneetan:

Zientziazko dastaketak. NUP ikertzen ari den produktuei buruzko proba bat da, hala nola garagardoak, ardoak, gourmet produktuak edo kosmetikoak. Bertaratzen direnek elaborazio horiek probatzeko edo dastatzeko aukera izanen dute, horiek prestatzeko prozesu zientifikoak ezagutzen dituzten bitartean.

Zientzia-pintxoak. Giro lasaian, Civicaneko kafetegian 15-20 minutuko mikrohitzaldiak eginen dira, eta ikus-entzuleek ikertzaileekin hitz egiteko aukera izanen dute. Formatu labur eta ulergarrian, hainbat gairi buruz hitz eginen da, hala nola adimen artifizialaren historia, hiri osasungarriagoak irudikatzea edo ekonomia zirkularra.

Esperimentuak. Adin guztietarako zientzia interaktiboko espazio bat da, zientzia esploratzeko eta harekin jolasteko: gorputzeko elektrizitatea neurtzeko, landareak “in vitro” landatzeko, minbiziaren ikerketari lotutako zelula fluoreszenteak aurkitzeko, familiako “low-cost” tailerretan parte hartzeko, 3D hologramekin, errealitate areagotuarekin eta minisumo robotekin esperimentatzeko.

Zientziazko ibilaldiak. Irteera gidatuak dira iluntzean saguzarrak entzuteko, Sadar ibaiaren arroa esploratzeko edo Iruñeko hirigunean dauden matematikak ezagutzeko, natura, ondarea eta zabalkundea uztartuz.

Zientzia artearekin. Jarduera horietan, sormena eta dibulgazioa uztartzen dira: “UPNA Show” -eko bakarrizketa zientifikoak, dantza errealitate birtualarekin (“Inmersant eta Contactier”) eta “Entre Deimos y Phobos” musika eta poesia Marteren ilargipean elkartzen dituen proposamen poetiko-musikala.

Tuterako eta Lizarrako programak

Aurten Tuteran ere eginen dira jarduerak, bertako testuingurura egokituak. Tudela Green Temple-n (lehengo San Nicolás elizan) bi esperientzia gastronomiko eginen dira irailaren 25ean, osteguna. Batetik, NUPeko Nekazaritzako Elikagaien arloko Transferentziari eta Berrikuntzari buruzko INTIA Katedrak aztergai izanen du olibondoaren etorkizuna Nafarroan, eta, bestetik, ”Sukaldariak eta zientzia” programak Erriberako sukaldarien eta erakunde akademikoko zientzialarien arteko elkarrizketa eskainiko du. Gainera, Lestonnac Gizarte Etxeak Tuterako campuseko ikertzaileek zuzendutako bi tailer eskainiko ditu: batean, errendimendu fisikoaren eta osasunaren ebaluazio pertsonalizatuak eginen dira, eta, bigarrenean, parte-hartzaileek 3D inprimaketarekin esperimentatzeko aukera izanen dute.

Irailaren 25ean, osteguna, Lizarra zientziaren, artearen eta herritarren partaidetzaren topagunea izanen da Gavia Los Llanos kafe antzokian. Ekitaldiari hasiera emanen dio kode eta mezu sekretuen tailer batek. Dictel elkarteak antolatu du tailerra (Lizarrako Zabalkunde Zientifiko-Teknikorako Elkartea). Ondoren “Monologoak zientziaz” eginen dira, eta NUPeko ikertzaileak eszenatokira igoko dira beren ezagutza umorez partekatzeko. Iluntzean saguzarrak entzuteko ibilaldi bat egiteko aukera ere izanen da, eta, egunari amaiera emateko, Harmonices Mundiren ikuskizun musikal bat izanen da, zientzia, musika eta poesia uztartzen dituena, Marteren ilargipean.