Ayuntamiento Estella-Lizarra Udala

Estella-Lizarra eta Villatuerta lotzen dituen bizikletentzako bide berria dagoneneko martxan dago: 7,3 kilometro (4,7 Lizarrako lurretan), bederatzi tarte eta hiru adar ditu. Proiektua, Nafarroako Gobernuko Garraio eta Mugikortasun Iraunkorreko Zuzendaritza Nagusiaren diru-laguntzarekin gauzatu dena, Ega hirian hasten da, Erromesen Iturriaren parean (Judutegi Berriko harresiaren ondoan), hortik, Ega ibaiarekiko bide paraleloari jarraituz, Nobeletan sartzen da Villatuertako industrialdera iritsi baino lehen, industrialde hori inguratuz.

Han, Eurovelo ibilbidearekin eta Done Jakue bidearekin hainbat puntutan konekta daiteke. Ibilbideak badu abantaila bat: oso inklinazio txikia du, eta ohiko joan-etorriak egiteko oso erabilgarria da, bai bizikletentzat bai oinezkoentzat. Gainera, ibaia alde batetik hurbil dagoelako eta mosaiko naturalistikoa beste aldera dagoelako, paisaia- eta ekologia-balio handiko bazterretatik igarotzen da.

Proiektuaren azken faseak bat egin du Lizarrako ongietorria ematen duen gurutzetik La Merced pasabidera doan tartea, eta tarte hori itxita egon da orain arte zenbait finka pribatu zeharkatzeagatik. Azkenik, jabeekin lagapen akordioa lortu da, eta Udalak berariaz eskertu nahi die haien prestasuna, adostasuna eta eskuzabaltasuna.

Proiektua gauzatzeko, bi udalek hitzarmen bat sinatu dute Nafarroako Gobernuarekin, bizikleta erabiliz mugikortasun jasangarria bultzatzeko, bai aisialdian, bai, esaterako, Villatuertako industrialdera lanera joateko.

NATUR PASEALEKUA

Aldi berean, Estella-Lizarra tartean, La Merced eta Candeliterako pasaguneen artean, Udalak pasealeku natural bat prestatu du, lehendik dagoen berezko landarediaren aprobetxamendua eta egokitzapena (adibidez, ibaiertzeko zuhaiztia) eta eremu horretarako egokiak diren zuhaixkak eta zuhaitzak landatzea konbinatzen dituena. Hori guztia, ingurumenari buruz kontzientziatzeko, ingurua edertzeko eta klima-aldaketaren aurkako borrokan laguntzeko. Eraikin publikoetan (Turismo Bulegoa, Liburutegia…) pasealekuari buruzko informazioa duen triptiko batera sar daiteke.

Lanak amaitzeko, seinaleak jarriko dira, ibilbidearen planoa eta erabilera-gomendioak barne: abiadura-mugak (10 km/h-ko tarteak daude, eta 20 km/h-ko beste zati batzuk); bizikleta eta oinezkoentzat erabilera partekatua; kaskoa erabiltzeko gomendioa; ingurunea zaintzea eta hondakinak ez botatzea; edo ibilgailu motordunekin ibiltzeko debekua.