Estella-Lizarrako Udalak bat egin du aurten lehen aldiz Titirired txotxongilo jaialdiarekin. Jaialdiak hamaikagarren edizioa du aurtengoa, eta Nafarroako beste sei herrik parte hartzen dute: Cintruénigo, Ribaforada, San Adrian, Viana, Valtierra eta Azagra.
Ega hiriak lehen edizio honetan parte hartuko du, apirilaren 19an eta 26an, hau da, Aste Santuko oporretako bi larunbatetan. Biak 18:00etan izanen dira Los Llanos Kulturagunean eta emanaldi bakoitzaren prezioa 4 eurokoa izanen da.
Herri parte-hartzaileetako ordezkariek gaur goizean aurkeztu dute egitaraua Lizarran, eta gainerako herrietan, leku finkatuenean, hiru ikuskizun izanen dira.
Ana Duarte Kultura zinegotziak nabarmendu du “familia osoarentzako ikuskizun handiak” direla, eta herri desberdinen arteko sare-lanari esker “kalitate handiko obrak prezio merkeagoetan eta prezio herrikoiekin ekar daitezkeela Aste Santuko opor bete-betean”. 1-2 urtetik aurrerako txikientzako ikuskizunak izango dira, “baina erakargarriak eurekin doazen familientzat ere”.
Urte hauetan 15.000 pertsona baino gehiagok gozatu ahal izan dute Tititired jaialdiaz, zazpi udalek antolatua eta Nafarroako Gobernua, Nafarroako Rural Kutxa, Grupo Apex eta Diario de Navarra laguntzaile dituena, adierazi dute Marcos Navascués (Cintruenigo), Noemí Hernández (Ribaforada) eta Javier Bonafau (Viana) zinegotziek.
BI OBRA ESTELLA-LIZARRAN
Apirilaren 19an, Ega hirian, La Canica konpainiaren ‘Chinchulina y el ruiseñor de la China’ ikuskizuna iritsiko da. 50 minutu inguruko iraupena du Txinako enperadorearen historia kontatuz, bere jauregi ederretik inoiz atera gabea, eta tradizioarekin hautsi eta Ruiseñor Azul izeneko txori bitxi baten bila ateratzea erabaki zuena. Haren bila dabilela, bere inperio zabaleko biztanle xumeen ahaleginak, ardurak eta ametsak ezagutu ditu.
Apirilaren 26an, berriz, ‘Sé tortuga’ ikuskizuna izanen da, Lleidako Xip-Xap konpainiarena. Fabularen formularekin, oilar batek eta haren dortoka maitagarriek gauzak lasai eta presarik gabe bizitzearen eta gozatzearen garrantzia ikusaraziko dute.
Aurten ere, haurrek beren sormena adierazteko aukera izanen dute, ikusitako lanei buruzko marrazkiak eta/edo esaldiak irudikatuz. Horretarako materiala banatuko da eta marrazkiak ikusgai jarriko dira, parte hartzaile guztien artean sariak zozketatuz.
Aldi berean, Kultur Etxeak ‘Txotxongiloaren magia’ erakusketa hartuko du apirilaren 30etik maiatzaren 11ra. Bertan, Humo Kolektiboak bere ibilbide luzean txotxongilolari gisa erabili dituen dekoratuak, antzerkitxoak eta materialak egongo dira.
