Ayuntamiento Estella-Lizarra Udala

Estella-Lizarra, Udalak bultzatutako ekimen batean, Destino Turistiko Adimenduna izeneko diagnostiko-prozesuari lotutako lanekin hasi da. Udalerriak prozesu horri men eginen dio, SEGITTURen (Turismoaren Estatu Idazkaritzaren mendeko Berrikuntza eta Turismo Teknologiak Kudeatzeko Estatuko Sozietatea) laguntzarekin.

Prozesu hori erronka handia da udalerriarentzat, dakartzan aldaketa guztiengatik; izan ere, Helmuga Turistiko Adimenduna izateak ez du soilik teknologiarekin eta berrikuntzarekin zerikusia, helmugaren gobernantzarekin, jasangarritasunarekin eta irisgarritasunarekin ere badu zerikusia.

Proiektuaren hasieran, helmugaren auditoria bat eginen da, eta, horren bidez, 97 baldintzatan eta 261 adierazletan oinarritutako diagnostiko bat lortuko da, DTI baten ardatz nagusien multzorako (gobernantza, berrikuntza, teknologia, jasangarritasuna eta irisgarritasuna), baldintza bakoitzak helmugan duen heldutasun-maila baloratzeko aukera ematen duena. Diagnostiko hori egin ondoren, gomendio batzuk egiten dira, eta, horietan, norakoak eskumen-arlo bakoitzari lotutako jarduera-eremuetan (gobernantza, berrikuntza, teknologia, jasangarritasuna eta irisgarritasuna) egin behar dituen hobekuntza guztiak sartzen dira, helmuga turistiko adimendun gisa aitortua izateko.

Helmuga Turistiko Adimendunen metodologian oinarritutako garapen-eredu baten alde egiteak onura ugari ekarriko dizkio Estella-Lizarrako turismo-sistema osatzen duten eragile guztiei: helmuga kudeatzen duen erakundeari, enpresa-sare osoari, eta, hedaduraz, bertako gizarte osoari eta turistari berari. Onura horien artean hauek nabarmentzen dira:

• Lidergoa destinoaren eraldaketan, frogapen-efektu indartsu batekin.
• Sinergiak sortzea eta baliabideak modu eraginkorrean aprobetxatzea.
• Kultura kooperatiboa eta tokiko turismo-politika hobetzea, gobernantza hobetzeko.
• Udalerriaren posizionamendua hobetzea, mundu mailan aitzindaria den proiektu baten garapenari esker.
• Kultura berritzailea sortzea, bai administrazioan, bai tokiko enpresa-sarean.
• Lehiakortasun turistikoa handitzea.
• Esperientzia turistikoa bere osotasunean hobetzea.

Helmuga turistiko adimenduneko programa

Helmuga Turistiko Adimenduna programa Turismoko Estatu Idazkaritzak (SETUR) sustatutako eta SEGITTURek kudeatutako proiektua da, turismo-lekuen lehiakortasuna eta bertako biztanleen bizi-kalitatea hobetzen laguntzeko helburua duena, bost jarduera-eremutan eraginez: gobernantza, berrikuntza, teknologia, jasangarritasuna eta irisgarritasuna.

Helmuga Turistiko Adimenduna helmuga turistiko berritzaile gisa definitzen da, abangoardiako azpiegitura teknologiko baten gainean finkatua, lurralde turistikoaren garapen jasangarria bermatzen duena, guztiontzat irisgarria, bisitariaren eta inguruaren arteko interakzioa eta integrazioa errazten duena eta helmugan duen esperientziaren kalitatea eta egoiliarraren bizi-kalitatea hobetzen dituena.

Helburu horiek lortzeko, DTI programak turismo-jardueraren zeharkakotasuna eta helmuga bakoitzaren ezaugarri bereizgarriak kontuan hartzen dituen kudeaketa-eredua ezartzea sustatzen du. Diagnostiko-metodologia baten gainean egituratzen da, 97 baldintza eta 261 adierazletan oinarritua, eta gomendio-sistema eta monitorizazio-sistema batean oinarritzen da. Horiek osatzen dituzte ereduaren funtsezko elementuak, eta helmugaren kudeaketa etengabe hobetzeko prozesu bat ahalbidetzen dute, turismoaren egungo eta etorkizuneko erronketara egokitua.

Espainiak garatutako DTI eredua erreferentzia da estatuan eta nazioartean, eta jardunbide egokitzat aitortu dute Turismoaren Mundu Erakundeak (OMT), Europako Batzordeak, Lankidetzarako eta Garapenerako Erakundeak (OECD) edo Garapenerako Banku Interamerikarrak (BID). Era berean, DTI ekimena 2019ko Espainiako Hiri Agendaren parte da.