1977tik urtero, Museoen Nazioarteko Kontseiluak (ICOM, ingelesezko sigletan) Museoen Nazioarteko Eguna antolatzen du. Maiatzaren 18an ospatzen da, eta nazioarteko museokomunitatearentzat une paregabea da.
Museoen Nazioarteko Egunaren (MNE) helburua honako honetaz kontzientziatzea da: «Museoak kultura-trukerako, kulturak aberasteko eta elkar ulertzeko, lankidetzarako eta herrien arteko bakea garatzeko bitarteko garrantzitsuak dira».
Etengabeko eraldaketak markatutako garai honetan, museoak aldaketaren abangoardian daude, aldatzen ari diren gertaera globalek eta eboluzioan dauden behar sozialek moldatutako panorama dinamikoan nabigatuz. 2025. urteko Museoen Nazioarteko Egunaren gaiak, Museoen etorkizuna etengabeko aldaketan dauden komunitateetan, museoen garrantzia nabarmendu nahi du, gizarte, teknologia eta ingurumen aldaketa sakonen aro honetan, non museoak eboluzionatzen ari diren gaurko erronkei aurre egiteko eta biharko aukerei forma emateko.
Museoek kultur nortasunaren funtsezko lokailu berritzaile eta zaintzaile gisa duten eginkizunari
buruz hausnartzera gonbidatzen gaitu. ICOMek Dubain egin duen 27. Konferentzia Orokorrarekin bat etorriz, gai honek etortzear dauden elkarrizketa kritikoak azpimarratzen ditu, museoek ondare immateriala babestu, gazteen energia aprobetxatu eta muga teknologiko berrietara egokitu dezaketela aztertuz. Elkarrekin, museoak eta komunitateak ahalduntzeko bide kolektibo bat eginen dugu, aldaketa azkarren aurrean aurrera egin dezaten.
Egun hauetan milaka museok antolatzen ditugu ekitaldi eta jarduera sortzaileak, museoek gizartearen zerbitzura eta garapenean duten zeregina nabarmentzeko.
Horretarako, Gustavo de Maeztu Museotik jarduera batzuk diseinatu ditugu Museoen Nazioarteko Eguna ospatzeko.
Angela Moreno artistaren «Begiratu eta (elkarri) begiratu» erakusketarekin hasiko gara. Maiatzaren 9an inauguratu zen eta 2025eko ekainaren 29ra arte bisitatu ahal izanen da.
Maiatzaren 17an, larunbata, 10:00etatik 12:00etara marrazketa tailerra izango da, «Marra eta espresioa», Iñaki Rifaterrak koordinatua. Bertan, ildoa eta giza aurpegia landuko dira, praktika artistikotik eta hausnarketa kolektibotik abiatuta. Erretratua edo autoerretratua. Aurpegirako hurbilketa lineal bakoitzean, marrazten duenaren zati bat geratzen da, behaketatik eta adierazpenetik abiatuta.
Parte-hartzaile bakoitzak nahi dituen marrazteko materialak ekarri ahal izango ditu, eta koadernoa eta arkatza ekarri beharko ditu. Aldez aurretik izena eman beharko da, aurrez aurre edo telefonoz, Gustavo de Maeztu Museoan.
Maiatzaren 17an, larunbata, 11:30ean, publiko guztientzako hitzaldi bat egonen da. Hasiera batean, Fermín Alvira artistak parte hartuko du, eta Gustavo de Maeztu margolariaren bizitza eta obraren ezohiko ikuspegia eskainiko du. Lizarran bizi izan zen artista gasteiztarraren izaera abenturazalea kontuan hartuta, logikoa da bere ekoizpena ikuspuntu sozial eta inklusibo batetik irakurtzea.
Alde batetik, bere interesa exotikoa dela esan daiteke, eszena glamurosetan pertsona dotoreak protagonista dituzten koadroetan. Bestalde, Gustavo de Maeztuk beste kulturei egindako begiradak interpretazio antropologikoa eskain lezake. Gainera, bere proposamenen sentsibilitateak landa-eremura, ijitoengana eta errealismo sozialera hurbiltzen gaitu.
Hitzaldian Gustavo de Maezturen biografiari buruzko zertzelada batzuk emanen ditu eta ondoren, Museoko 4. Aretoko zenbait lan konparatiboki aztertuko dira, pinturara hurbiltzeko estrategiak eskainiz.
Ferminen hitzaldiaren ondoren, Pilar Martinez Arce «Asociación Patrimonio para Jóvenes» elkarteko lehendakariak hartuko du hitza. Elkartean daramatzan hamabost urteetan ikusi dituen aldaketa sozial eta kulturalei buruzko bere ikuspuntua emanen digu, Gustavo de Maeztu Museoan gertatu diren alderdi eta pasadizoak komentatuz. Museoak aurrean ditugun erronka sozial berrietan nola esku har dezakeen aztertuko du; izan ere, museoek zeregin garrantzitsua dute etorkizun jasangarriak eratzen eta sortzen, hezkuntza-programen, erakusketen, dibulgazio komunitarioaren eta ikerketaren bidez. Horrela, museoen eta komunitateen arteko harreman estuagoak sustatzeko eta kultur trukea bultzatzeko.
Azkenik, kezka kolektiboko gaiei buruzko hausnarketa egitera gonbidatuko dituzte bertaratutakoak, betiere Gustavo de Maezturen begirada liluragarriaren bidez.
Maiatzaren 18an, igandea, 12:00etan, musikazale guztiak liluratuko dituen musika-saio berezia izanen da. Fernando Sanchez saxofoi-jotzaileak bakarkako kontzertua eskainiko du, bere azken lanetako pop doinuekin.
Jarduera hauetarako sarrera doakoa da eta adin guztiei zuzenduta daude. Gainera, Museoa bere udako ordutegian bisitatu daiteke; asteartetik ostiralera 9:30etik 13:30era eta 16:00etatik 19:00etara, igande eta jaiegunetan 11:00etatik 14:00etara, astelehenetan Museoa itxita dago.
