Ayuntamiento Estella-Lizarra Udala

Gaur goizean aurkeztu da Frai Diego Kultur Etxean Estella-Lizarrako 2026ko jai patronalen programa ofiziala. Aurtengo edizioak berrikuntza garrantzitsuak izango ditu, eta musika, familia eta aisialdi eskaintza publiko guztientzat zabaltzeko apustua egiten du. Ana Duarte Jaietako zinegotziak aurkeztu ditu programaren xehetasunak, Marta Ruiz de Alda alkatearekin eta Azucena Polo Berdintasun eta LGTBI Politiketako zinegotziarekin batera.

Uztailaren 31tik abuztuaren 6ra ospatuko diren jaiek guztira 172 ekitaldi izango dituzte zazpi jai egunetan zehar, eta horiez gain beste zazpi jarduera ere egingo dira programa nagusitik kanpo. Horien artean daude 2025ean jaiotako haurrei zapiaren ezarpena, Txilindroiko Arkume Lehiaketa edo abuztuaren 7 eta 8ko zezensuzkoak. Guztira, 168 orduko jarduera etenik gabe eskainiko dira, egunean batez beste 24 ekitaldirekin.

SU ARTIFIZIALEN BI EGUN ETA PILOTA JAIALDI BI

Berrikuntza nagusien artean daude piroteknia eta kirol programazioaren indartzea. Aurtengo jaiek bi su artifizial bilduma handi izango dituzte, 2025eko eskaintza bikoiztuz. Ikuskizunak abuztuaren 2an eta 3an izango dira, igandean eta astelehenean, Valentziako Vulcano piroteknia etxearen eskutik.

Kirol programazioa ere indartu egingo da, pilota profesionaleko bi jaialdirekin: bata igandean izango da eta bestea asteartean, orain arte programa ofizialean ohikoa zen jaialdi bakarraren ordez.

HUECCO, PURO RELAJO ETA ORQUESTA MONDRAGON

Musikaren arloan, Udalak ikuskizun-orquesten aldeko apustua mantentzen du, baita Foruen plazako gaueko programazioa indartzearen aldekoa ere. Berritasun nagusietako bat abuztuaren 1ean, larunbatean, iritsiko da: Orquesta Mondragonek kontzertua eskainiko du bere 50. urteurreneko biraren barruan.

Musika programazioa La Poptelera taldearen emanaldiarekin osatuko da larunbat berean. Taldearen buru Mario Martínez da, Operación Triunfo saioko hirugarren edizioko finalista. Asteartean, berriz, Puro Relajo talde nafarraren txanda izango da, Nafarroako talde maite eta ezagunenetako bat, Vulcano orkestraren saioen artean ariko dena.

Bestalde, abuztuaren 5ean, asteazkenean, Huecco artista madrildarra iritsiko da Estella-Lizarrara, ‘Pa mi guerrera’, ‘Mirando al cielo’ edo ‘Se acabaron las lágrimas’ bezalako arrakasten egilea, bere azken lanaren, ‘CrazyXXversario’ diskoaren, biraren barruan. Kontzertuaren aurretik eta ondoren DJ saioak izango dira.

Haiekin batera, Kripton, Jamaica Show, Taxxara, Vulcano eta Gran Reserva orkestrak ere igaroko dira Foruen plazatik.

HAURRENTZAKO JARDUERA GEHIAGO

Familiek eta haurrek berriz ere protagonismo berezia izango dute programan. Berrikuntzen artean dago astelehen goizean Foruen plazan ur-parke handi bat jartzea, eta horrez gain, astearteko Haur Egunean Los Llanos pasealekuan egingo den ohiko haur parkea ere mantenduko da.

Era berean, haur zezenketak hiru egunetara zabalduko dira aurten, asteartean, asteazkenean eta ostegunean egingo baitira, aurreko urteetan izan duten harrera onaren ondorioz.

Haur programazioa ere indartu egingo da Los Llanos pasealekuko ikuskizunen kopurua handituz: sei jardueratik zortzira igaroko dira, horietatik bost gaztelaniaz eta hiru euskaraz izango direlarik.

BESTE BERRITASUN BATZUK

Beste berrikuntza bat jaietako azken egunean, ostegun arratsaldean, iritsiko da. Batukada ibiltari batek hiriko hainbat gunetan zehar egingo du ibilbidea zezen plazako ekitaldien ondoren, gaueko programazioa hasi aurretik kaleak girotzeko helburuarekin.

Udalak, era berean, Estella-Lizarrako jaien nortasuna osatzen duten tradizioei eutsiko die: bajadikak, Erraldoi eta Buruhandien Konpartsa, entzierroak, ekitaldi erlijiosoak, herri musika eta hiriko peña eta kolektiboen parte-hartzea.

ERASO SEXISTEN PREBENTZIOA

Azucena Polo Berdintasun eta LGTBI Politiketako zinegotziak nabarmendu du Udalak jaietan eraso sexisten aurkako sentsibilizazio eta prebentzio ekintzak indartuko dituela.

Berrikuntza gisa, jaietako programa ofizialak indarkeria sexistaren aurkako mezu instituzional bat jasoko du, eta esku gorri handi bat jarriko da Foruen plazan. Horrez gain, bost lona ipiniko dira hiriko hainbat puntu estrategikotan, honako leloarekin: ‘Gozatu dibertsioaz presiorik gabe’.

Puntu Morea berriro ere Koroatze plazan kokatuko da eta jaietako egun nagusietan egongo da zabalik. Bertan, informazio eta sentsibilizazio materiala banatuko da, hala nola abanikoak, LGTBI+ kolektiboari zuzendutako material espezifikoa eta eraso sexisten aurrean jarduteko udal gida.

Polok herritar guztiei dei egin die jaiak «askatasunez, errespetuz eta beldurrik gabe gozatzeko espazio» izan daitezen.

AURREKONTUA

Aurtengo jaietarako aurrekontua 352.000 eurokoa izango da, eta horren barruan sartzen dira jai-programazioa, kolektibo eta elkarteentzako dirulaguntzak, azpiegiturak, alokairuak, hesiak eta jaiak antolatzeko beharrezkoak diren hainbat zerbitzu. Kopuru horri gehitu behar zaio zezen-ikuskizunak antolatzeko urte anitzeko kontratua, urtean 72.500 eurokoa, nahiz eta zenbateko horren barruan Puyko Ama Birjinaren jaietako zezen-ekitaldiak ere sartzen diren.

• EGITARAUA: Lizarrako festak EGITARAUA 2026